राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसईई) को नतिजा आगामी दुई दिनभित्रै सार्वजनिक गर्ने तयारी गरेको छ। गत चैत १९ देखि २९ सम्म सञ्चालन भएको परीक्षामा ५ लाख १२ हजार ४२१ विद्यार्थी सहभागी भएका थिए। परीक्षा केन्द्रमै उत्तरपुस्तिका परीक्षण गरिएकाले यसपटक बोर्डले परीक्षा सकिएको एक महिनाभित्रै त्रुटिरहित नतिजा प्रकाशन गर्न लागेको हो। अहिले अन्तिम रुजुको काम भइरहेको र बोर्ड बैठक बसेलगत्तै नतिजा सार्वजनिक गरिनेछ।