काठमाडौँ, २७ वैशाख – माध्यमिक शिक्षा परीक्षा (SEE) दिएर नतिजाको पर्खाइमा रहेका ५ लाखभन्दा बढी विद्यार्थीहरूको प्रतीक्षा अब सकिने भएको छ। राष्ट्रिय परीक्षा बोर्डले आगामी दुई दिनभित्रै नतिजा सार्वजनिक गर्ने गरी सम्पूर्ण तयारी पूरा गरेको छ।
रणनीति फेरिएपछि नतिजा छिटो
विगतका वर्षहरूको तुलनामा यसपटक बोर्डले नतिजा छिटो सार्वजनिक गर्न विशेष रणनीति अपनाएको थियो। परीक्षा नियन्त्रक टुकराज अधिकारीका अनुसार यस वर्ष उत्तरपुस्तिका परीक्षण परीक्षा केन्द्रमै गरिएको थियो, जसले गर्दा समयको निकै बचत भएको छ।
“हामी नतिजा सार्वजनिक गर्ने अन्तिम चरणमा आइपुगेका छौँ। आईटी टोलीले डाटा रुजु (Verification) गर्ने काम गरिरहेको छ। पर्सिसम्ममा नतिजा बाहिर आउँछ,” नियन्त्रक अधिकारीले जानकारी दिए।
यस वर्षको माध्यमिक शिक्षा परीक्षा (एसईई) को नतिजा सार्वजनिक गर्ने अन्तिम तयारीमा राष्ट्रिय परीक्षा बोर्ड जुटेको छ। गत चैत १९ देखि २९ गतेसम्म सञ्चालन भएको यस परीक्षामा कुल ५ लाख १२ हजार ४२१ विद्यार्थीले फारम भरेका थिए, जसमा नियमिततर्फ ४ लाख ४१ हजार ५६६ र ग्रेड वृद्धितर्फ ७० हजार ८५५ जना रहेका छन्। सहभागी परीक्षार्थीहरूमध्ये छात्राको संख्या २ लाख ५७ हजार ६१३ र छात्रको संख्या २ लाख ५४ हजार ८०१ रहेको छ भने अन्य ७ जनाले पनि परीक्षा दिएका छन्।
बोर्डले यसपटक परीक्षा केन्द्रमै उत्तरपुस्तिका परीक्षण गर्ने रणनीति अपनाएका कारण परीक्षा सकिएको एक महिनाभित्रै नतिजा प्रकाशन गर्न सफल भएको हो। हाल आईटी शाखाले तथ्याङ्क प्रविष्टि (Entry) मा कुनै त्रुटि नहोस् भन्नका लागि अन्तिम चरणको रुजु गरिरहेको छ। यो प्राविधिक काम सकिनेबित्तिकै बोर्डको बैठक बसेर नतिजा सार्वजनिक गरिने तयारी छ। नतिजा प्रकाशन भएपश्चात् विद्यार्थीहरूले विभिन्न आधिकारिक वेबसाइट, एसएमएस र आईभीआर (IVR) सेवामार्फत सजिलै आफ्नो मार्कसिट प्राप्त गर्न सक्नेछन्।
